Galen: De Antidotis (On Antidotes)

πάλιν ἑτέραν πολύχρηστον ἔγραψεν ἐξ ρ΄. συγκειμένην, ἐξαιρέτως δὲ, ὥς φησι, πρὸς τὰ θανάσιμα καὶ τοὺς πνιγομένους ὑπὸ ψιμμυθίου. εἶτα μετὰ ταύτας τὴν διὰ τῆς Λημνίας μίλτου, περὶ ἧς ἤδη καὶ πρόσθεν ἔγραψα, παραγράψας τὰ Δαμοκράτους ἔπη. τὴν ἄλλην οὖν παραλιπὼν, τὴν ἐξ ρ΄. συγκειμένην, ἀρκεσθήσομαι τῇ τε Ζωπυρίῳ καὶ τῇ μετ᾿ αὐτὴν γεγραμμένῃ. καὶ προσέτι τὴν διὰ τῆς Λημνίας μίλτου παραλιπὼν τὴν ἑκατονταμίγματον. ἡ αὐτὴ γὰρ ἐστὶ τῇ ὑπ᾿ Ἀνδρομάχου γεγραμμένῃ Ζωπύριος ἀντίδοτος, ποιοῦσα πρὸς ἅπαντα, ἰδιαίτερον δὲ πρὸς τὰ θανάσιμα καὶ πρὸς ἡπατικοὺς, καὶ τὰς ἐμπνευματώσεις τῆς κοιλίας, καὶ τὰς ἀρχομένας παρεγχύσεις, καὶ μάλιστ᾿ ἐφ᾿ ὧν ἐστι πλέον πνεῦμα, τὸ παρακείμενον. ♃ Σμύρνης δραχ. ε΄. νάρδου Συριακῆς δραχ. ε΄. S". κρόκου δραχ. δ΄ S". σχοίνου ἄνθους δραχ. β΄ S". κασσίας δραχ. δ΄. κινναμώμου δραχ. γ΄. πεπέρεως λευκοῦ δραχ. α΄ S". λιβάνου δραχ. α΄. ὀβολὸν α΄. κόστου δραχ. α΄. μέλιτι Ἀττικῷ ἀναλάμβανε, καὶ ποιῶν τροχίσκους καρύου Ποντικοῦ τὸ μέγεθος, δίδου μετ᾿ οἰνομέλιτος ἢ μεθ᾿ ὕδατος.